Novas

Novas do Concello

A Consellería de Medio Ambiente asinará un convenio co Concello para pavimentar a Avenida de Soutelo. Foi un dos compromisos acadados pola Alcaldesa na xuntanza que mantivo co Conselleiro Agustín Hernández

Lourenzá, 16 de febreiro de 2013. A alcaldesa de Lourenzá, Emma Álvarez Chao, reuniuse en Santiago co conselleiro de Medio Ambiente, Infraestruturas e Territorio, Agustín Hernández, para solicitar a colaboración dese departamento da Xunta en varios asuntos de interese para o municipio.

A corporación municipal estreou hoxe nova ubicación para os plenos. Na sesión aprobouse a modificación do regulamento do Punto de Atención á Infancia e a declaración do 2013 como ano de Francisco Fernández del Riego

Lourenzá, 15 de febreiro de 2013. No pleno ordinario da corporación municipal de Lourenzá que se celebrou hoxe os concelleiros estrearon nova ubicación para as sesións, no salón de actos da Casa do Concello, e aprobaron a declaración de 2013 como ano dedicado a Francisco Fernández del Riego, con motivo do centenario do seu nacemento. Tamén acordaron modificar o regulamento do punto de atención á infancia “para facilitar a conciliación da vida familiar e laboral”, explicou a portavoz do goberno municipal, Lupe Flórez.

O Concello de Lourenzá informa das deduccións da cota do canon da auga

O canon da auga, que ven de substituír o canon de saneamento, foi creado pola Lei 9/2010, do 4 de novembro, de augas de Galicia. Non obstante, o inicio da súa aplicación non tivo lugar ata o 1 de xullo de 2012, momento no que entrou en vigor o Decreto 136/2012, do 31 de maio, polo que se aproba o Regulamento do canon da auga a sistemas públicos de depuración de augas residuais.

O canon da auga, ten como finalidade; por un lado, financiar as actuacións do ciclo da auga e por outro, primar o uso responsable da auga.

A delegada territorial da Xunta confirmou un investimento de 30.000 euros para melloras no CEIP Juan Rei na xuntanza que mantivo hoxe coa alcaldesa. Emma Álvarez solicitoulle a Raquel Arias axuda do goberno autonómico para outros asuntos pendentes e novas

Lourenzá, 13 de febreiro de 2013. A alcaldesa de Lourenzá, Emma Álvarez Chao, reuniuse esta mañá coa delegada territorial da Xunta para a provincia de Lugo, Raquel Arias “para poñela ao corrente dos asuntos que están pendentes dende o noso Concello coa administración que ela representa, a Xunta de Galicia, así como presentarlle novas necesidades a fin de acadar a colaboración co Concello de Lourenzá.

A Alcaldesa destacou a labor e os logros de J.Mª López Noceda como Rexedor Mpal e Pdte. da Mancomunidade Municipios da Mariña. Os seus restos mortais están sendo velados na Casa de Concello. O Funeral será o Martes ás 17h na Igrexa Parroquial de Lourenzá.

Lourenzá, 11 de febreiro de 2013. A alcaldesa de Lourenzá, Emma Álvarez Chao, destacou a labor e algúns dos logros de José María López Noceda durante a súa etapa de rexedor municipal e tamén como primeiro presidente da Mancomunidade de Municipios de A Mariña. Os seus restos mortais están sendo velados na capela ardente que quedou instalada esta mañá na Casa do Concello e o funeral será mañá, martes, ás cinco da tarde na igrexa parroquial de Lourenzá.

Faleceu José María López Noceda, que fora Alcalde de Lourenzá, o primeiro Presidente da Mancomunidade de Municipios da Mariña e Deputado Autonómico. A Capela Ardente quedará instalada na Casa do Concello o Luns, dende as 10 h e será enterrado o Martes.

Lourenzá, 10 de febreiro de 2013. José María López Noceda faleceu ás oito e media da tarde de hoxe, domingo, no Hospital da Costa, de Burela, aos 81 anos de idade. A capela ardente cos restos mortais do que fora alcalde de Lourenzá, primeiro presidente da Mancomunidade de Municipios da Mariña e deputado autonómico do Partido Popular quedará instalada na Casa do Concello dende mañá, luns, ás dez da mañá.

A casa da cultura acollerá unha charla da Secretaria Xeral de Urbanismo, Encarna Rivas, para falar da planificación do territorio. A alcaldesa considera que é un acto moi interesante para todos os veciños

Lourenzá, 9 de febreiro de 2013. O día 19 deste mes de febreiro, martes, ás sete e media da tarde a secretaria xeral de Ordenación do Territorio e Urbanismo, Encarna Rivas, impartirá no salón de actos da casa da cultura de Lourenzá unha charla informativa co título “A planificación do territorio como ferramenta de convivencia”.

Enxeñeiros de Augas de Galicia visitaron a ponte sobre o río Batán no Camiño A e farán un informe para o seu arranxo. Mentres, un dos carrís quedará cortado ao tráfico e no outro seguirá prohibido o paso a vehículos de máis de 8 toneladas

Lourenzá, 8 de febreiro de 2013. Técnicos do ente autonómico Augas de Galicia visitaron esta mañá o municipio de Lourenzá para ver o estado no que se atopa a ponte sobre o río Batán na estrada coñecida como Camiño A, concretamente no lugar de Sendín, pertencente á parroquia de San Xorxe. Mentres elaboran un informe sobre os arranxos que precisa a ponte danada polo temporal do pasado mes de xaneiro un dos carrís do vial quedará cortado ao tráfico e polo outro seguirá prohibido o paso para vehículos de máis de 8 toneladas.

Co baile do taller de memoria empezaron onte os actos de Antroido en Lourenzá. O día grande será o domingo de piñata co tradicional desfile no que se repartirán 4.700 euros en premios

Lourenzá, 7 de febreiro de 2013. Lourenzá iniciou os distintos actos que con motivo do Entroido se van desenvolver no municipio organizados por distintas asociacións e tamén polo Concello. No día de onte celebrouse o primeiro deles, que foi o baile do taller de memoria, “onde unha ducia de persoas maiores e a profesora estaban disfrazadas”, explicou a alcaldesa, Emma Álvarez Chao.

Distribuir contido