Novas

Novas do Concello

Un arquitecto da Xunta visitará Lourenzá en xaneiro para proxectar a creación dun campo de fútbol que se destinará ao adestramento dos equipos que hai no municipio

Lourenzá, 20 de decembro de 2012. A alcaldesa de Lourenzá, Emma Álvarez Chao, reuniuse esta mañá en Santiago co secretario xeral para o Deporte da Xunta, José Ramón Lete Lasa, para analizar a construción dun campo de fútbol para adestramento dos equipos que hai no municipio. Esa instalación será de herba natural, en vez da sintética que estaba prevista inicialmente e que agora se descarta debido ao seu elevado custo. Para preparar o proxecto un arquitecto da Xunta desprazarase a Lourenzá no vindeiro mes de xaneiro.

OS ALUMNOS DO TALLER DE MEMORIA PARTICIPARON NUNHA FESTA DE NADAL, NA QUE HOUBO REGALOS, CHOCOLATADA E PANXOLIÑAS

Lourenzá, 19 de decembro de 2012. 42 alumnos do taller de memoria do Concello de Lourenzá participaron na festa de Nadal celebrada onte, martes.

No festexo os asistentes repartiron regalos entre eles co sistema do amigo invisible, tomaron chocolatada con roscón, brindaron cunha copa de sidra e cantaron panxoliñas.

No acto participaron a alcaldesa, Emma Álvarez Chao, e a concelleira de Educación, Cultura e Turismo, Lupe Flórez Seivane.

As actividades de Nadal programadas polo Concello empezan con obradoiros para os nenos. O prazo para apuntarse está aberto ata o xoves día 20

Lourenzá, 15 de decembro de 2012. A Concellería de Educación, Cultura e Turismo de Lourenzá abriu onte, venres, o prazo para anotarse nos Obradoiros de Nadal que se van a desenvolver nas próximas vacacións escolares.”Este prazo de inscrición ten como obxectivo repartir por idades aos nenos/as participantes para adaptar as actividades ás diferentes idades que poidan confluír”, explicou a concelleira Lupe Flórez.

Todos os alumnos do Colexio Juan Rey aportaron xoguetes para que a Cruz Vermella os destine a familias con escasos recursos

Lourenzá, 14 de decembro de 2012. Todos os alumnos do CEIP Juan Rey, de Lourenzá, aportaron un xoguete, e algúns levaron varios, no acto organizado polo Concello, que se celebrou na tarde de onte, para colaborar coa Cruz Vermella na recollida de xogos para entregar a familias con escasos recursos. A alcaldesa, Emma Álvarez Chao, comentou que “isto demostra a solidariedade dos nenos e tamén que esta acción está ben encamiñada, posto que os máis pequenos entenden a lección”.

Lourenzá será un ano máis sede dos campionatos comarcais de campo a través

A primeira proba (preparatoria) disputarase en Sta. Cruz o sábado 12 de xaneiro, mentres que a clasificatoria para o campionato provincial terá lugar o 19 de xaneiro. Espéranse cerca de 200 rapac@s competindo nas categorías de benxamín, alevín, infantil e cadete. A competición empezará a partir das 11,00 e agárdase que remate sobre as 13,00 horas. Organizan a Secretaría Xeral para o Deporte da Xunta de Galicia e a A.D. A Mariña; e colaboran na mesma o Concello de Lourenzá, as E.D. Lourenzá e Protección Civil.

O concello recuperou a tradición da árbore de nadal despois de moitos anos e haberá unha megafonía con panxoliñas nas rúas de Vilanova

Lourenzá, 12 de decembro de 2012. O Concello de Lourenzá recuperou este ano a tradición de colocar unha árbore de Nadal xunto á casa consistorial despois de moitos anos sen facelo. Tamén se instalou un pequeno alumeado e nos vindeiros días porase en funcionamento unha megafonía con panxoliñas polas rúas de Vilanova, “todo con moita austeridade pola situación económica que estamos a vivir”, explicou a alcaldesa, Emma Álvarez Chao.

Emma Álvarez fixo un balance moi positivo do encontro mantido esta mañá co presidente da Xunta

Lourenzá, 7 de decembro de 2012. A alcaldesa de Lourenzá, Emma Álvarez Chao, fixo un balance moi positivo do encontro que mantivo en Santiago de Compostela co presidente da Xunta, Alberto Núñez Feijoo.

Álvarez declarou: “non podo máis que facer un balance positivo. Na xuntanza falamos de distintos temas e comprometeuse con Lourenzá e cos laurentinos para tratar de buscarlles solucións”.

Distribuir contido