Novas

Novas do Concello

OITO ESTABLECEMENTOS DE VILANOVA OFRECERÁN 20 TAPAS DE BALDE NA SEXTA RUTA DA FESTA DA FABA DE LOURENZÁ, DO 4 AO 6 DE OUTUBRO. O PRIMEIRO DÍA HABERÁ CANTOS DE TABERNA NAS RÚAS E NOS LOCAIS PARTICIPANTES

Lourenzá, 25 de setembro de 2013. A sexta edición da ruta de tapas con fabas de Lourenzá, que organiza o Concello, conta coa participación de oito establecementos hostaleiros de Vilanova, que ofrecerán 20 tapas de balde do 4 ao 6 de outubro. Na tarde noite do primeiro día haberá cantos de taberna nas rúas e nos locais participantes.

Descargar folleto en PDF

O CONCELLO ORGANIZA UNHA NOVA EDICIÓN DO TALLER DE MEMORIA. OS/AS INTERESADOS/AS EN PARTICIPAR PODEN INSCRIBIRSE ATA O VINDEIRO 11 DE OUTUBRO NO CENTRO SOCIAL TORREÓN DOS FRADES

Lourenzá, 24 de setembro de 2013. O Concello organiza unha nova edición do taller de memoria. A inscrición está aberta e rematará o 11 de outubro, tal e como informa a alcaldesa, Emma Álvarez, a través dun bando.

O taller será impartido polo departamento de Servizos Sociais do Concello. No bando sinálase que “para realizar a inscrición hai que achegarse ata o centro social Torreón dos Frades de 10 a 13 horas ou poñerse en contacto con Dolores Villasuso, a educadora familiar, chamando ao seguinte teléfono: 982 12 10 36”.

O PASADO SÁBADO O 21 DE SETEMBRO DE 2013 A ASOCIACIÓN DE SENDEIRISMO TERRAS DE LOURENZÁ ORGANIZOU UNHA ANDAINA POLA RUTA DO CARES

O pasado sábado 21 de Setembro de 2013, a Asociación de Sendeirismo Terras de Lourenzá, organizou unha ruta que ningún sendeirista debería deixar de facer, a Ruta do Cares. Nela participaron unhas 40 persoas, que tras percorrer uns 23, 5 km aproximadamente cruzaron de Posada de Valdeón a Poncebos, repoñendo forzas en Caín. A ruta tivo, como non podía ser doutro xeito, unha gran aceptación e os sendeiristas deron fe da preciosidade da mesma e os encantos que esconde, magnificados polo impresionante dia do que se disfrutou.

MAIORES VECIÑOS DO CONCELLO DE LOURENZÁ ASISTIRON A UN OBRADOIRO DE LECTURA E ESCRITURA EN GALEGO

Maiores veciños do concello de Lourenzá asistiron a un obradoiro de lectura e escritura en galego organizado polo Servizo de Normalización Lingüística da Mancomunidade de Concellos da Mariña Luguesa durante este mes de setembro. Este obradoiro impartiuno a técnico do servizo, que é a licenciada en filoloxía galego-portuguesa Mª Luz Pérez Goás, quen explicou que “a finalidade era crear un espazo onde as persoas de entre 60 e 80 anos puidesen compartir o pracer da lectura e da escritura en lingua galega.

ESTE MES A CHARLA ORGANIZADA POLO CONCELLO ESTÁ DEDICADA AOS PROBLEMAS DE CONVIVENCIA COS ADOLESCENTES. SERÁ IMPARTIDA POR UNHA PEDAGOGA O VINDEIRO XOVES ÁS OITO DA TARDE NO SALÓN DE ACTOS

Lourenzá, 21 de setembro de 2013. Neste mes de setembro a charla organizada polo Concello de Lourenzá está dedicada aos problemas de convivencia cos adolescentes. Será impartida pola pedagoga Carolina García Chico o vindeiro xoves, día 26, ás oito da tarde no salón de actos municipal.

A ALCALDESA ACEPTA A COLABORACIÓN DA DEPUTACIÓN DE LUGO PARA A FESTA DA FABA DESPOIS DAS CONVERSAS MANTIDAS NAS ÚLTIMAS HORAS CO DEPUTADO ÁLVARO SANTOS

Lourenzá, 20 de setembro de 2013. A alcaldesa de Lourenzá, Emma Álvarez Chao, aceptou a colaboración ofrecida pola Deputación de Lugo, que non inclúe achega económica, para a vindeira edición da Festa da Faba, que se celebrará do 4 ao 6 de outubro. A rexedora tomou esta decisión despois das conversas telefónicas que mantivo nas últimas horas co deputado delegado da Área de Cooperación e Asistencia ós Concellos, Álvaro Santos Ramos. Pero Emma Álvarez mantén que as axudas económicas do organismo provincial para os diferentes eventos deberían ser equitativas.

A ALCALDESA ACUSA DE SECTARISMO AO GOBERNO DA DEPUTACIÓN DE LUGO TRAS RECIBIR UNHA CARTA NA QUE O ORGANISMO PROVINCIAL COMUNICA QUE NON CONCEDERÁ AXUDA ECONÓMICA PARA A FESTA DA FABA DESTE ANO

Lourenzá, 19 de setembro de 2013. A alcaldesa de Lourenzá, Emma Álvarez Chao, acusa de sectarismo ao goberno da Deputación de Lugo despois de recibir unha carta na que o organismo provincial comunica ao Concello que non lle concederá ningunha axuda económica para a Festa da Faba deste ano.

A DELIMITACIÓN DA RUTA DA COSTA DO CAMIÑO DE SANTIAGO ESTÁ A EXPOSICIÓN PÚBLICA NAS OFICINAS MUNICIPAIS ATA O 3 DE NOVEMBRO E OS INTERESADOS PODEN PRESENTAR ALEGACIÓNS. A ALCALDESA ANÚNCIAO A TRAVÉS DUN BANDO QUE FIXO PÚBLICO HOXE

Lourenzá, 18 de setembro de 2013. A delimitación da Ruta da Costa do Camiño de Santiago está a exposición pública nas oficinas municipais de Lourenzá ata o día 3 de novembro e os interesados poden presentar alegacións. Anunciouno a alcaldesa, Emma Álvarez Chao, a través dun bando que fixo público hoxe.

Distribuir contido