Novas

Lourenzá, 21 de xuño de 2013. O Concello de Lourenzá e a Consellería de Medio Rural asinaron dous convenios de colaboración para a prevención e extinción de incendios forestais no municipio, para o que serán contratadas 8 persoas durante este verán.

Lourenzá, 19 de xuño de 2013. A Casa do Concello de Lourenzá acolle dende hoxe as dependencias da Oficina Municipal de Rehabilitación e do Punto de Información Catastral, polo que agora teñen o número de teléfono 982.12.10.06.

A continuación tedes un enlace para ver os traballos presentados ó Concurso Escolar de Fotografía, dedicado á natureza na Mariña de Lugo, e celebrado en conmemoración do Día Mundial do Medio Ambiente. Desde aquí queremos aproveitar para dar as grazas a todos os que participaron nesta iniciativa.

Lourenzá, 18 de xuño de 2013. O Concello de Lourenzá acaba de abrir o prazo de inscrición para os campamentos de verán, que acollerán a nenos e rapaces de 5 a 16 anos durante os meses de xullo, agosto e setembro ata o inicio do curso escolar. Terán un prezo total, para todo o verán, de 15 euros e o prazo para anotarse rematará o día 27 deste mes de xuño, xoves. Anunciouno hoxe a concelleira delegada de Educación e Cultura, Lupe Flórez Seivane.

Lourenzá, 17 de xuño de 2013. O Concello de Lourenzá xunto coa asociación de comerciantes, industriais e autónomos do municipio (ACIAL) acaban de convocar un concurso de carteis co gallo da 23ª Festa da Faba, que vai ter lugar a primeira fin de semana de outubro deste ano. É a primeira vez que se organiza un certame para a elaboración do cartel anunciador deste festexo, imaxe que van levar tamén os programas, os dípticos de man e os demais materiais que se utilicen para anunciar o evento. Anunciouno hoxe a concelleira de Cultura, Lupe Flórez Seivane.

Lourenzá, 15 de xuño de 2013. O equipo de baloncesto feminino foi recibido hoxe na Casa do Concello como homenaxe polo ter logrado o ascenso á Primeira División Nacional. No acto a alcaldesa, Emma Álvarez Chao, falou do pasado, do presente e do futuro do club e destacou que o deporte é un dos grandes escaparates do municipio.

Lourenzá, 14 de xuño de 2013. A comisión creada para elaborar o escudo do Concello de Lourenzá, formada por representantes políticos e das asociacións dos municipio, celebrou a primeira xuntanza de traballo, na se formularon varias propostas. Contou coa presenza do presidente e do vicepresidente da Comisión Heráldica da Xunta de Galicia, Norberto Uzal e Eduardo Pardo de Guevara.

Lourenzá, 13 de xuño de 2013. O equipo de goberno levará a pleno unha moción para instar á Deputación de Lugo a que conceda de novo unha subvención de 4.000 euros á festa da faba, tal e como viña facendo desde o 2007, pero que o ano pasado se viu reducida a 1.000 euros.

Lourenzá, 13 de xuño de 2013. Catro escolares de Lourenzá resultaron premiados na fase provincial do certame das Letras Galegas 2013, cuxa temática era A toda máquina.

Os galardoados son María Sánchez Villalba, co segundo premio na categoría A de debuxo; Jerom Moirón Trigo, con accésit na categoría A de narración; Javier Álvarez Méndez, co segundo premio na categoría B de narración; e Antía Lillo Irimia, con accésit na categoría B de narración.

Lourenzá, 12 de xuño de 2013. As actividades celebradas en Lourenzá dende o día 1 deste mes para conmemorar do Día do Medio Ambiente remataron onte cun acto no que se entregaron os premios do concurso escolar de fotografía e houbo unha charla sobre a natureza a cargo do profesor do Consejo Superior de Investigaciones Científicas (CSIC) Miguel Delibes de Castro. Desenvolveuse no salón de actos da Casa do Concello, que estivo ateigado de público.