Novas

Novas do Concello

A Xunta axudará ao Concello para reparar unha ponte da parroquia de Santo Adrao que corre risco de derrubamento. A alcaldesa abordou este asunto en Santiago coa Conselleira do Medio Rural

Lourenzá, 12 de xuño de 2013. A alcaldesa de Lourenzá, Emma Álvarez Chao, reuniuse hoxe en Santiago coa conselleira de Medio Rural, Rosa Quintana, e co secretario xeral Tomás Fernández Couto, para solicitarlles axuda da Xunta para reparar unha ponte da parroquia de Santo Adrao que corre risco de derrubamento. A administración autonómico colaborará co Concello para a execución da obra, segundo anunciou a rexedora municipal, quen tamén falou cos responsables de Medio Rural sobre a creación da cooperativa comercializadora da Faba de Lourenzá.

As actividades conmemorativas do Día do Medio Ambiente no Concello rematarán mañá, martes, coa entrega dos premios do concurso de fotografía e a continuación unha charla a cargo do profesor Miguel Delibes de Castro

Lourenzá, 10 de xuño de 2013. As actividades para conmemorar o Día do Medio Ambiente no concello de Lourenzá rematarán mañá, martes, coa entrega de premios do concurso escolar de fotografía sobre a natureza na Mariña lucense e a continuación unha charla a cargo do profesor Miguel Delibes de Castro. Será ás oito da tarde no salón de actos da Casa do Concello.

Cinco membros das Escolas Deportivas Municipais acadaron medallas no Campionato Galego de Atletismo celebrado hoxe en Vilagarcía de Arousa

Lourenzá, 8 de xuño de 2013. Cinco nenos e nenas membros das escolas deportivas municipais Lourenzá-Mondoñedo acadaron medallas no campionato galego de atlestismo celebrado hoxe en Vilagarcía de Arousa, polo que reciben a felicitación da alcaldesa laurentina, Emma Álvarez Chao; do concelleiro de Deportes, Pablo Maseda, e do Concello de Lourenzá.

A Alcaldesa xestionou na Xunta o apoio das Consellerías de Medio Rural e de Traballo para crear unha cooperativa comercializadora de Faba de Lourenzá

Lourenzá, 7 de xuño de 2013. A alcaldesa, Emma Álvarez Chao, mantivo unha reunión en Santiago co director xeral de Relacións Laborais, Odilo Martiñá, e co secretario xeral de Medio Rural, Tomás Fernández-Couto; para promover a creación en Lourenzá dunha cooperativa que comercialice a faba da Mariña lucense a través da marca Indicación Xeográfica Protexida (IXP) Faba de Lourenzá.

Un bando regula a celebración das fogueiras de San Xoán e San Pedro. O prazo para solicitar o permiso remata o día 20 deste mes

Lourenzá, 6 de xuño de 2013. O Concello de Lourenzá fixo público un bando sobre as fogueiras de San Xoán e San Pedro para que se celebren nunhas condicións de seguridade axeitadas, segundo informou hoxe o concelleiro de Medio Ambiente e Medio Rural, Antonio Reigosa, quen anunciou que o prazo para solicitar o permiso remata o día 20 deste mes.

A Casa do Concello acolleu hoxe o fallo do Concurso de Fotografía para conmemorar o Día Mundial do Medio Ambiente

Lourenzá, 5 de xuño de 2013. O xurado do concurso de fotografía para conmemorar o Día Mundial do Medio Ambiente en Lourenzá reuniuse hoxe para elixir aos mellores dos 77 traballos presentados. Todos eles serán expostos e os premios entregaranse o día 11 deste mes ás oito da tarde no salón de actos do Concello, onde a continuación haberá unha charla sobre a conservación da natureza a cargo de Miguel Delibes de Castro.

Sesión de contacontos "Violeta, a carteira bolboreta", que se desenvolveu hoxe nas instalacións do colexio Juan Rey

Hoxe tivo lugar a sesión de contacontos titulada "Violeta, a carteira bolboreta", nas instalacións do colexio Juan Rey, de Lourenzá, a cargo de Mau e Pin, que son os autores da colección de libros Polo correo do vento. O obxectivo desta actividade, incluída no programa da Semana do Medio Ambiente, era inculcar aos nenos que deben respectar o medio ambiente. Mau e Pin contaron a historia e ao mesmo tempo fixeron as ilustracións nuns murais que será coloreados polos nenos.

A Casa da Cultura acolleu a entrega de premios do Certame de Narración e Debuxo convocado pola Biblioteca Municipal para conmemorar o Día das Letras Galegas 2013

Lourenzá, 1 de xuño de 2013. O acto de entrega de agasallos e diplomas aos premiados no certame de narración e debuxo convocado pola biblioteca municipal Juana de Ibarbourou, de Lourenzá, tivo lugar na sala de exposicións da Casa da Cultura do Concello e as encargadas de dar os premios foron a alcaldesa, Emma Álvarez; a concelleira de Cultura e presidenta do xurado, Lupe Flórez; e a bibliotecaria e secretaria do xurado, María José López.

A exposición da Xunta sobre o cooperativismo que estivo nos locais da lonxa hortoflorícola recibiu unhas 200 visitas. Os alumnos dun curso de albanelería e riscos laborais estiveron na mostra

Lourenzá, 1 de xuño de 2013. A exposición sobre cooperativismo que tivo instalada a Xunta de Galicia nos locais da lonxa hortoflorícola de Lourenzá recibiu unhas 200 visitas, entre elas a dos alumnos dun curso de albanelería e riscos laborais impartido a finais do ano pasado, que ademais recibiron os diplomas por participar nesa actividade formativa.

Distribuir contido