Novas

COA CONVOCATORIA DO 19º CONCURSO FOTOGRÁFICO FESTA DA FABA COMEZAN AS ACTIVIDADES PREVIAS AO FESTEXO, QUE SE CELEBRARÁ DO 2 AO 4 DE OUTUBRO

O Concello de Lourenzá convocou a 19ª edición do concurso fotográfico Festa da Faba. Deste xeito comezan as actividades previas ao festexo, que se celebrará os días 2,3 e 4 de outubro.

O certame de fotografía ten un tema libre, coa única condición de ser imaxes representativas e recoñecibles da zona de produción da Faba de Lourenzá. O premio para a mellor serie de fotos é de 500 euros. Cada concursante poderá presentar un máximo de 6 imaxes e un mínimo de 4. O prazo de presentación remata o día 21 de setembro.

INICIADAS AS OBRAS DUNHA ESCOLLERA NO LUGAR DA TILLEIRA (LOURENZÁ) TRAS OS DANOS PRODUCIDOS POLA CHOIVA A FINAIS DE 2014. FORON SUPERVISADAS POLA ALCALDESA, ROCÍO LÓPEZ

Lourenzá, 10 de agosto de 2015. A Xunta de Galicia iniciou as  obras de construción dunha escollera que permitirá mellorar os accesos ao lugar da Tilleira, na parroquia de Santa María. As choivas caídas no termo municipal de Lourenzá o pasado mes de decembro de 2014 fixeron que o talude desta estrada se desprendese  e a vía  que da acceso ao barrio da Tilleira quedase case totalmente descolgada,  o que supoñía un perigo para vehículos e viandantes, explicou a alcaldesa, Rocío López. 

OS NENOS E EDUCADORES DO PUNTO DE ATENCIÓN Á INFANCIA DE LOURENZÁ CELEBRARON A FESTA DE FIN DE CURSO CUNHA TARDE DE XOGOS E MERENDA NO RECINTO FEIRAL

Lourenzá, 3 de agosto de 2015. O Punto de Atención á Infancia (PAI) Meniños, de Lourenzá, festexou o pasado venres a festa de fin de curso cunha tarde de xogos e merenda na que participaron os nenos e nenas do centro, así como as familias e as educadoras. Aínda que o lugar previsto para a festa era a área recreativa da Cazolga, o mal tempo non o permitiu e o acto tivo que trasladarse ao recinto feiral de Lourenzá.

O PAZO DE TOVAR ACOLLERÁ ESTE DOMINGO A PRESENTACIÓN DA NOVELA HISTÓRICA CATALINA DE SANTISSO, QUE DESENVOLVE PARTE DA SÚA TRAMA NAS TERRAS DE LOURENZÁ

Lourenzá, 30 de xullo de 2015. O pazo de Tovar, en San Tomé de Lourenzá, será este próximo domingo, 2 de agosto o escenario da presentación da obra titulada Catalina de Santisso, unha novela histórica de Aurora García Rivas. A cita será ás 19:30 horas e o lugar escollido non é casual, xa que parte da acción da novela transcorre no propio Pazo de Tovar no século XVI.