Novas

O Concello Organiza unha charla sobre a Lei de Montes para conmemorar o Día Forestal Mundial o vindeiro Xoves, día 21 deste mes. Falará o Subdirector Xeral de Prevención e Defensa Contra os Incendios Forestais, Miguel Ángel Cela

Lourenzá, 14 de marzo de 2013. Co gallo do Día Forestal Mundial, que se celebra o vindeiro 21 de marzo, o Concello de Lourenzá organiza unha charla para “explicar a primeira lei de montes de Galicia, a lei 7/2012 de 28 de xuño, que xa está en vigor desde o 17 de agosto do ano pasado”, anunciou hoxe a alcaldesa, Emma Álvarez Chao, que na súa etapa como deputada autonómica foi poñente desa lei.

Presentouse no Salón de Actos do Concello de Lourenzá a nova equipación das Escolas Deportivas para esta nova temporada, así como a renovación dos patrocinadores

O pasado venres presentouse no Salón de Actos do Concello de Lourenzá a nova equipación das Escolas Deportivas para esta nova temporada, así como a renovación dos patrocinadores. No acto estiveron Emma Álvarez Chao, alcaldesa de Lourenzá; Pablo Maseda Fdez, concelleiro de Deportes; e os capitáns do primeiro equipo Dani Rego, Montxinho Seivane, David "Garrafín" e Iván Recalde.

Celebrada a primeira sesión do obradoiro de baile moderno e hip hop organizado pola Concellería de Educación

83 alumnos de 6 a 12 anos de idade do Ceip Juan Rey, de Lourenzá, participaron hoxe na primeira sesión do obradoiro de baile moderno e hip hop organizado pola Concellería de Educación, da que é responsable Lupe Flórez Seivane. Esta actividade continuará en Semana Santa (dende o luns 25 ata o mércores 27 deste mes) e poderán participar nenos e rapaces de 6 a 24 anos. Os interesados deben anotarse na biblioteca pública municipal en horario de cinco a oito da tarde. O prazo de inscrición remata o xoves, 21.

Inauguración da exposición "Mulleres no obxectivo", na Casa da Cultura de Lourenzá

Na sala de exposicións da Casa da Cultura de Lourenzá pódese ver ata o vindeiro 22 de marzo a exposición Mulleres no obxectivo, composta por 23 imaxes de fotoperiodistas galegos e galegas que recollen o día a día das mulleres. O horario de visita é de 17 a 20 horas. A mostra foi inaugurada na tarde de onte pola alcaldesa, Emma Álvarez, acompañada da concelleira de Educación e Cultura, Lupez Flórez, e de responsables do departamento de Servizos Sociais. Ao acto acudiron os alumnos do taller de memoria.