O CONCELLO DE LOURENZÁ MELLORA OS ACCESOS A PAIZÁS E A REGA E PROGRAMA ACTUACIÓNS NOUTRAS VÍAS DO MUNICIPIO.

Lourenzá, 10 de febreiro de 2026. O Concello de Lourenzá está realizando obras para mellorar os accesos a Paizás e A Rega e a alcaldesa, Rocío López, anuncia tamén que están programadas actuacións noutras vías do municipio.

A rexedora municipal explica que se están levando a cabo obras “para mellorar algunhas vías no municipio, concretamente nos accesos a Paizás e á Rega. Están enmarcadas dentro do plan Camiña Rural 2025-2026 cun orzamento total de 66.306 euros, dos cales a Axencia Galega de Desenvolvemento Rural aporta 54.798 euros e o Concello de Lourenzá, 11.508 euros”.

Rocío López engade: “o que pretendemos con estas obras é seguir avanzando nese plan de mellora das infraestruturas do noso municipio, sempre atendendo ás prioridades, ás necesidades e ao estado no que se atopan e tendo en conta tamén as peticións da veciñanza. Nos próximos días informaremos das actuacións previstas que se van levar a cabo noutras vías do noso municipio”.