Novas

ISMAIL ITRIH, DE 5 ANOS, É O GAÑADOR DO PRIMEIRO CERTAME DE POSTAIS DE NADAL DE LOURENZÁ ENTRE UN TOTAL DE CASE 80 TRABALLOS PRESENTADOS

Ismail Itrih, alumno de 5 anos de idade do CEIP Juan Rey de Lourenzá, foi elixido o pasado venres, 12 de decembro, gañador do I Certame de Postais de Nadal. Un xurado formado por directivos da Asociación de Comerciantes, Industriais e Autónomos de Lourenzá así como por persoal da área de Cultura do Concello e polo director do colexio Juan Rey foi o encargado de valorar os traballos entregados nesta primeira edición do concurso.

O SALÓN DE ACTOS DA CASA DO CONCELLO ALBERGARÁ O VINDEIRO MARTES UNHA CHARLA SOBRE RECICLAXE E PROTECCIÓN DO MEDIO AMBIENTE

O Concello de Lourenzá organiza para o vindeiro martes, 16 de decembro, unha charla sobre reciclaxe e protección do medio ambiente baixo o título Separemos ben, reciclaremos mellor. Non rompas o esforzo de todos. A actividade levarase a cabo ás 20:00 horas no salón de actos da Casa do Concello e contará coa presenza de técnicos de SOGAMA. Con esta iniciativa o Concello espera concienciar aos veciños sobre como reciclar correctamente cada produto de cara ao aumento de consumo que traen consigo as compras de Nadal.

O CONCELLO PON EN MARCHA A SÚA CAMPAÑA DE RECOLLIDA DE XOGUETES EN COLABORACIÓN COA CRUZ VERMELLA. A RECOLLIDA FARASE NO TORREÓN DOS FRADES ATA O VENRES 19 DE DECEMBRO E ESE DÍA HABERÁ UNHA CHOCOLATADA NO CEIP JUAN REY

Os Servizos Sociais do Concello de Lourenzá puxeron en marcha a recollida de xoguetes para este Nadal 2014, en colaboración coa Cruz Vermella. Os veciños poderán facer as súas doazóns no Torreón dos Frades ata o venres 19 de decembro, día no que rematará esta campaña cunha chocolatada no CEIP Juan Rey.

LOURENZÁ ACOLLERÁ OS DÍAS DE VIÑOS E TAPAS ESTE FIN DE SEMANA, VENRES 12 E SÁBADO 13, E O MERCADO DE NADAL CELEBRARASE NO MERCADO GANDEIRO OS DÍAS 20 E 21 CUNHA TRINTENA DE POSTOS

Lourenzá acollerá os Días de Viños e Tapas este fin de semana, concretamente o venres 12 e o sábado 13, e o Mercado de Nadal celebrarase no mercado gandeiro os días 20 e 21 cunha trintena de postos. Estes dous eventos están organizados pola Asociación de Comerciantes, Industriais e Autónomos de Lourenzá (ACIAL) e contan coa colaboración do Concello de Lourenzá.