Galego
EspañolEsta pasada fin de semana celebrouse o primeiro Gran Premio Faba de Ouro de tiro olímpico, evento organizado por un grupo de laurentinos que se iniciaron recentemente nesta práctica deportiva e que contaron coa colaboración do Concello de Lourenzá.
Esta proba celebrouse nas instalacións do Real Aeroclub de Lugo e reuniu a algúns dos mellores tiradores de Galicia, Asturias e Castela-León. O gañador da Faba de Ouro foi Darío Piroscia Penado, do CTO Castro, de Ferrol. Na categoría sénior o podio completárono José Manuel Arias Vázquez, do Aeroclub Lugo, en segundo lugar; e Gervasio Murado Linares, do mesmo club e que foi terceiro.
Na categoría damas a vitoria foi para Verónica Amado Figueredo, do Aeroclub Lugo; seguida por Judith Baña Matalobos, do CTO Castro, de Ferrol; e María Teresa Pérez Grao, de Club Cabe, de Monforte.
Na categoría veteranos el podio ocupárono, por esta orde: Javier Pereira Lopez, do Aeroclub Lugo; Manuel Rivas Couso, tamén do Aeroclub Lugo; e Manuel Torrón Puga, do Club San Froilán, de Lugo.
A entrega de trofeos levouse a cabo no Pazo de Tovar (Lourenzá), onde os participantes se xuntaron nunha comida.
A organización da Tirada da Faba de Ouro de Lourenzá agradeceu a todos os participantes, árbitros e voluntarios a súa colaboración e dedicación. Tamén expresou a súa gratitude ao Concello de Lourenzá pola súa contribución e cooperación con este evento.
