A COMPAÑÍA EL RUISEÑOR, DE CULLEREDO, GAÑA O VII CERTAME DE TEATRO CONCELLO DE LOURENZÁ COA OBRA A XUNTANZA

Na tarde do pasado sábado, 13 de decembro, nunha gala con gran afluencia de público, foron entregados os premios de VII Certame de Teatro Concello de Lourenzá. A obra A xuntanza, da compañía El Ruiseñor, de Culleredo, recibiu o premio Conde Santo á mellor representación. Así mesmo recolleron o premio á mellor posta en escena e o Lourenzo ao mellor actor, que recaeu en Fernando Moares.

O grupo Ollomao, de Barreiros, coa obra Dona Clara, recibiu o premio especial do público e Patricia Pérez o premio Ana á mellor actriz. O premio ao mellor actor de reparto foi para Quequé Mareque, de Teatro do  Asteleiro, de Ferrol, e o de mellor actriz de reparto para Nerea Acebo, de Imaxina-T, de Narón.

A gala foi presentada pola actriz laurentina Carmen de Picoaga, que tamén participou na obra Julieta en verano, representada polos grupos gijoneses Luz de Gas e El Callejón del Gato.

O Concello de Lourenzá agradece a asistencia dos veciños e veciñas tanto á gala como as distintas representacións que se levaron a cabo durante os sábados e domingos do mes de novembro no Multiusos Ponte de Cuñas. Tamén destaca dunha maneira especial “o difícil traballo realizado polo xurado encargado de valorar e premiar as distintas obras presentadas a concurso, todas elas dunha gran calidade”.