Galego
EspañolA Vila de Nadal de Vilanova de Lourenzá é este ano máis grande e inclúe varias novidades. Ademais o Concello aumentou a decoración nas parroquias de Santo Adrao, Santo Tomé e San Xurxo.
A alcaldesa de Lourenzá, Rocío López García, explica que a Vila de Nadal “empezou no 2016, cando xurdiu a idea de facer unha decoración navideña con material reciclado. A partir dese momento foise creando cada ano algunha cousiña nova e innovando ata chegar a todo o que hoxe temos aí. Ao principio eran poucas cousas e agora xa se nos queda a praza pequena e temos que ir estendéndoa a outras zonas. Nesta edición seguimos avanzando no tema dos oficios e puxemos un barbeiro e unha biblioteca. Outra das novidades é un tiovivo, para aumentar a escena que vén a representar unha festa; xa tíñamos unhas lanchiñas, uns músicos e agora fixemos ese carrusel. Tamén incluímos un leiteiro que está nunha bicicleta cos cántaros do leite, como antigamente. Outra novidade é que puxemos no quiosco a aldea dos gnomos”.
A rexedora municipal destaca que para Lourenzá “supón un reclamo turísticos nestas datas, sobre todo durante o Nadal, cando non hai tanto visitante como noutras épocas do ano. Pero agora xa é algo recoñecido, a xente sabe que está aí e cada ano son máis as persoas, sobre todo familias con nenos, que se achegan a visitalo. Xa veñen coa ilusión de ver que cousas novas hai este ano e os nenos son os que máis se acordan de todo o que hai porque ademais son os que identifican as novidades de cada edición”
A alcaldesa destaca “o traballo, o esforzo e a colaboración que hai detrás de todo isto. Unha vez que está colocado vese moi bonito, pero é un labor que leva moito tempo facelo, que se realiza nas naves do Concello; desde que remata a Festa da Faba, que é a primeira fin de semana de outubro, xa nos poñemos a traballar. Entre a xente que colabora estamos os concelleiros e eu mesma, que pintamos, cortamos e todo; tamén participan empregados municipais e algún veciño que nos vén axudar. Hai detrás disto moito traballo, non só para a montaxe de todo o que se ve senón tamén para a elaboración de todas as pezas”.
Rocío López anima a todos a que veñan visitalo, aínda que xa o viran outros anos, porque “nesta edición quixemos darlle un cambio a todo para facelo diferente. Entón aínda que moitas pezas son de anos anteriores están colocadas de xeito distinto, co cal cando a xente chega aquí ten a percepción de que está diferente. Dinnos que a situación deste ano é moito máis acolledora, está todo máis disperso”.
A Vila de Nadal poderá visitarse en Vilanova de Lourenzá ata o día 11 de xaneiro.
Ademais Concello de Lourenzá ampliou a decoración de Nadal ás parroquias, “o que é difícil porque hai moita extensión, pero intentamos que teñan tamén algo. E neste ano instalouse en cada parroquia -Santo Adrao, Santo Tomé e San Xurxo- unha decoración con iluminación que representa uns agasallos. E ademais na entrada do pobo puxemos o trineo de Papá Noel”, rematou a alcaldesa.
