Novas

A ÁREA RECREATIVA DA CAZOLGA ACOLLEU UNHA XORNADA DE CONVIVENCIA PARA CELEBRAR O PECHE DO CURSO NO PAI MENIÑOS, DE LOURENZÁ

Lourenzá, 1 de agosto de 2014. O Concello puxo onte o punto e final ao curso do Punto de Atención á Infancia (PAI) Meniños, de Lourenzá. Fíxoo celebrando unha xornada de convivencia cos nenos que formaron parte deste centro educativo no curso 2013/2014. Os cativos de 0 a 3 anos, acompañados por familiares e as coidadoras, puideron gozar dunha tarde repleta de actividades na área recreativa da Cazolga.

O CONCELLO PRESENTOU HOXE A XVIII EDICIÓN DO CONCURSO DE FOTOGRAFÍA FESTA DA FABA CUN PREMIO DE 500 EUROS PARA O GAÑADOR. OS INTERESADOS PODEN ENTREGAR ATA O 22 DE SETEMBRO OS SEUS TRABALLOS

Lourenzá, 31 de xullo de 2014. O Concello de Lourenzá presentou hoxe a súa XVIII edición do Concurso de Fotografía Festa da Faba para este ano 2014. Os traballos poderán presentarse, por correo ou en persoa, nas oficinas municipais ata o día 22 de setembro. As fotografías deberán basearse na temática Terras da Faba e o gañador recibirá un premio de 500 euros. No acto de presentación estiveron a alcaldesa de Lourenzá, Emma Álvarez; o concelleiro de Medio Ambiente, Antonio Reigosa, e a concelleira de Cultura e Turismo, Lupe Flórez.

REMATOU A PROGRAMACIÓN DE ACTIVIDADES LÚDICAS DE VERÁN ORGANIZADA POLO CONCELLO PARA OS MÁIS PEQUENOS, PERO CONTINUARÁ NO VINDEIRO MES DE AGOSTO PARA OS RAPACES MAIORES DE DEZ ANOS

Lourenzá, 31 de xullo de 2014. O Concello de Lourenzá puxo onte punto e final a súa programación lúdica dirixida a nenos de entre 4 e 9 anos. Así o anunciou a súa concelleira de Educación e Cultura, Lupe Flórez Seivane, quen recordou que a partir de agora e durante todo o vindeiro mes de agosto, continuarán as actividades deportivas enfocadas a rapaces maiores de 10 anos.

ESTE VENRES REMATA O PRAZO PARA INSCRIBIRSE NA EXCURSIÓN AO PARQUE ACUÁTICO DE CERCEDA, QUE SE LEVARÁ A CABO O 8 DE AGOSTO

Lourenzá, 29 de xullo de 2014. O prazo de inscrición para participar na excursión ao parque acuático de Cerceda organizada polo Concello de Lourenzá remata este venres, día 1 de agosto. A actividade, que se levará a cabo o 8 de agosto, está dirixida a nenos e nenas de máis de seis anos e as inscricións recóllense na Casa do Concello en horario de mañá, de 08 a 15 horas, e na Biblioteca Municipal pola tarde, de 17 a 20 horas.