Noticias

Lourenzá, 14 de xuño de 2013. A comisión creada para elaborar o escudo do Concello de Lourenzá, formada por representantes políticos e das asociacións dos municipio, celebrou a primeira xuntanza de traballo, na se formularon varias propostas. Contou coa presenza do presidente e do vicepresidente da Comisión Heráldica da Xunta de Galicia, Norberto Uzal e Eduardo Pardo de Guevara.

Lourenzá, 13 de xuño de 2013. O equipo de goberno levará a pleno unha moción para instar á Deputación de Lugo a que conceda de novo unha subvención de 4.000 euros á festa da faba, tal e como viña facendo desde o 2007, pero que o ano pasado se viu reducida a 1.000 euros.

Lourenzá, 13 de xuño de 2013. Catro escolares de Lourenzá resultaron premiados na fase provincial do certame das Letras Galegas 2013, cuxa temática era A toda máquina.

Os galardoados son María Sánchez Villalba, co segundo premio na categoría A de debuxo; Jerom Moirón Trigo, con accésit na categoría A de narración; Javier Álvarez Méndez, co segundo premio na categoría B de narración; e Antía Lillo Irimia, con accésit na categoría B de narración.

Lourenzá, 12 de xuño de 2013. As actividades celebradas en Lourenzá dende o día 1 deste mes para conmemorar do Día do Medio Ambiente remataron onte cun acto no que se entregaron os premios do concurso escolar de fotografía e houbo unha charla sobre a natureza a cargo do profesor do Consejo Superior de Investigaciones Científicas (CSIC) Miguel Delibes de Castro. Desenvolveuse no salón de actos da Casa do Concello, que estivo ateigado de público.

Lourenzá, 12 de xuño de 2013. A alcaldesa de Lourenzá, Emma Álvarez Chao, reuniuse hoxe en Santiago coa conselleira de Medio Rural, Rosa Quintana, e co secretario xeral Tomás Fernández Couto, para solicitarlles axuda da Xunta para reparar unha ponte da parroquia de Santo Adrao que corre risco de derrubamento. A administración autonómico colaborará co Concello para a execución da obra, segundo anunciou a rexedora municipal, quen tamén falou cos responsables de Medio Rural sobre a creación da cooperativa comercializadora da Faba de Lourenzá.

Lourenzá, 10 de xuño de 2013. As actividades para conmemorar o Día do Medio Ambiente no concello de Lourenzá rematarán mañá, martes, coa entrega de premios do concurso escolar de fotografía sobre a natureza na Mariña lucense e a continuación unha charla a cargo do profesor Miguel Delibes de Castro. Será ás oito da tarde no salón de actos da Casa do Concello.

Lourenzá, 8 de xuño de 2013. Cinco nenos e nenas membros das escolas deportivas municipais Lourenzá-Mondoñedo acadaron medallas no campionato galego de atlestismo celebrado hoxe en Vilagarcía de Arousa, polo que reciben a felicitación da alcaldesa laurentina, Emma Álvarez Chao; do concelleiro de Deportes, Pablo Maseda, e do Concello de Lourenzá.

Lourenzá, 7 de xuño de 2013. A alcaldesa, Emma Álvarez Chao, mantivo unha reunión en Santiago co director xeral de Relacións Laborais, Odilo Martiñá, e co secretario xeral de Medio Rural, Tomás Fernández-Couto; para promover a creación en Lourenzá dunha cooperativa que comercialice a faba da Mariña lucense a través da marca Indicación Xeográfica Protexida (IXP) Faba de Lourenzá.

Lourenzá, 6 de xuño de 2013. O Concello de Lourenzá fixo público un bando sobre as fogueiras de San Xoán e San Pedro para que se celebren nunhas condicións de seguridade axeitadas, segundo informou hoxe o concelleiro de Medio Ambiente e Medio Rural, Antonio Reigosa, quen anunciou que o prazo para solicitar o permiso remata o día 20 deste mes.

Lourenzá, 5 de xuño de 2013. O xurado do concurso de fotografía para conmemorar o Día Mundial do Medio Ambiente en Lourenzá reuniuse hoxe para elixir aos mellores dos 77 traballos presentados. Todos eles serán expostos e os premios entregaranse o día 11 deste mes ás oito da tarde no salón de actos do Concello, onde a continuación haberá unha charla sobre a conservación da natureza a cargo de Miguel Delibes de Castro.