Novas

LOURENZÁ ACOLLE DO 20 AO 26 DE AGOSTO O X FESTIVAL INTERNACIONAL DE CONTACT IMPROVISACIÓN

Lourenzá converterase entre os días 20 e 26 de agosto nun punto de encontro para persoas interesadas na danza, o movemento e o contact improvisación coa celebración do X Festival Internacional de Contact Improvisación, unha proposta cultural que chega por primeira vez á localidade para achegar ao público unha disciplina baseada na improvisación, o contacto corporal, a escoita e o movemento compartido, anuncia a alcaldesa, Rocío López García.

EN LOURENZÁ A FESTA NA PISCINA MUNICIPAL E A PRESENTACIÓN DO LIBRO DE MANUEL CANOSA, ACTIVIDADES DO PROGRAMA VERÁN NA PRAZA, CONTARON CON MOITA PARTICIPACIÓN

A alcaldesa de Lourenzá, Rocío López García, destaca o éxito de participación nas actividades do programa Verán na Praza celebradas a pasada fin de semana: a festa na piscina municipal, que houbo o venres, e a presentación do libro titulado Lope Sánchez de Moscoso, un vizconde no tempo de Enrique IV de Castela. Estudo histórico, análise e colección de documentos, escrito polo investigador e autor Manuel Canosa Trillo, evento que tivo lugar no salón de actos do Concello o sábado.

A ZUMBA AO AIRE LIBRE PROTAGONIZARÁ ESTE MÉRCORES, 19 DE AGOSTO, O VERÁN NA PRAZA EN LOURENZÁ

O programa Verán na Praza, impulsado polo Concello de Lourenzá, continúa esta semana cunha nova proposta “pensada para gozar do verán, facer actividade física e compartir un bo momento en comunidade”. Este mércores, día 19 de agosto, ás 20:00 horas, a Praza do Conde Santo acollerá unha sesión de zumba ao aire libre, “unha actividade dinámica e divertida aberta a todos os públicos”, anuncia a alcaldesa, Rocío López García.

CREADA EN LOURENZÁ UNHA ASOCIACIÓN DE MULLERES RURAIS

O Concello de Lourenzá anuncia a creación no municipio dunha asociación de mulleres rurais: “compartimos con moita ilusión a presentación da Asociación de Mulleres Rurais de Lourenzá, unha nova iniciativa que nace coa vontade de crear un espazo de encontro, participación e comunidade para as mulleres da nosa vila”.