LOURENZÁ OFRECE UNHA VISITA GUIADA ARREDOR DA FIGURA DE FRANCISCO FERNÁNDEZ DEL RIEGO

Este venres, día 17, presentouse en Lourenzá unha visita guiada arredor da figura de Francisco Fernández del Riego. No acto participaron membros da Mesa Coordinadora Don Paco; o presidente da Mancomunidade de municipios da Mariña, Fran Cajoto; representantes do CEIP Juan Rey e do instituto San Rosendo e directivos das distintas asociacións do concello, que iniciaron o percorrido na exposición 110 Anos de Del Riego, visionaron un documental sobre a figura do autor homenaxeado este ano no Día das Letras Galegas, percorreron varias rúas e prazas da vila seguindo as explicacións dunha audioguía coa voz ficcionada de Del Riego, visitaron a igrexa parroquial e o sarcófago do Conde Santo e remataron a visita na exposición de xoguetes tradicionais ubicada en dependencias do Mosteiro de San Salvador.

O concelleiro de Cultura en Lourenzá, Manuel Arango Ron, explica que “esta visita guiada funcionará durante todo o ano e para que tanto veciños como grupos de visitantes ou de escolares podan realizala deberán dirixirse á oficina de turismo do Concello de Lourenzá para reservar día e hora”.