Galego
EspañolDespois do pleno da corporación municipal de Lourenzá celebrado hoxe o goberno local destacou que o Concello reduciu o período medio de pago das facturas aos provedores ata 8,76 días. Na sesión foi aprobado o presuposto municipal para este ano 2015, que ascende a 1.700.000 euros.
A voceira do goberno local, Lupe Flórez Seivane, explicou que no pleno deuse a coñecer que “o período medio de pago de facturas a provedores no cuarto trimestre de 2014 quedou establecido en 8,76 días. Tendo en conta que o período legal de pago son 30 días parécenos importante que os provedores do Concello estean cobrando nese período de pago tan curto e que se rebaixou drasticamente respecto a etapas anteriores, nas que estivéramos en máis de 200 días”.
Lupe Flórez tamén deu a coñecer que “coa á aprobación da ordenanza para a xestión da biomasa aceptamos a proposta que nos fixo chegar a Federación Galega de Municipios e Provincias (FEGAMP) para establecer o camiño a seguir por parte do Concello no caso de ter que facer a xestión da biomasa que corresponde aos propietarios das fincas. Basicamente con esta ordenanza o Concello ampárase na Lei de Prevención de Incendios de Galicia 3/2007 e nas modificacións que fixo posteriormente a Lei de Montes 7/2012, onde se define que os propietarios destas fincas son os responsables da xestión da biomasa nas franxas de seguridade, tanto nos núcleos como nas zonas de casas illadas, e naqueles casos en que eses propietarios non se fagan cargo desa correcta xestión da biomasa será o Concello o que ten que asumir esa responsabilidade. Por tanto con esta ordenanza trátase de dotar ao Concello da legalidade que o ampare cando teña que limpar esas fincas que os propietarios non manteñan correctamente. Aprobouse cos votos a favor dos 6 concelleiros do PP e a abstención dos tres concelleiros do Partido Socialista”.
Tamén se aprobou unha proposta da Alcaldía para desafectar o inmoble destinado á lonxa agraria. “Basicamente baseámonos nun informe da comisión de seguimento desa lonxa, que é favorable á desafección xa que ven indicar que nos anos que leva funcionando nunca se utilizou como tal lonxa. Polo tanto é un punto a favor para proceder a esa desafectación, o que implicaría que deixase de ser un ben de dominio público e pasase a ser un ben de carácter patrimonial do Concello, sempre mantendo un uso agrario de interese público. Este asunto foi aprobado por unanimidade dos 9 concelleiros presentes na sesión plenaria”, comentou a portavoz do goberno local.
Ademais “dentro das certificacións e documentos que se poden conseguir no punto de información catastral creamos un novo apartado para un documento denominado certificación descritiva gráfica con relación de colindantes, que terá un custo de 1,07 euros a páxina. Ata agora non había a posibilidade de obter este documento, posto que o certificado que se expedía a día de hoxe era o que contiña os datos protexidos e por tanto tiña un custo de 16 euros. Cremos dende o equipo de goberno que o feito de ofrecerlles aos veciños a posibilidade de ter a un prezo máis económico ese documento descritivo que é valido para moitas xestións supón un avance”, destacou Flórez.
Tamén sinalou que se aprobou o presuposto municipal deste ano 2015 cos votos a favor do Partido Popular e a abstención dos concelleiros do Partido Socialista. “É de 1.700.000 euros e, segundo o informe de Secretaría e Intervención, probablemente poidamos baixar ao longo deste exercicio os gastos en débeda, xa que aínda non temos a autorización do Ministerio para o refinanciamento das operacións de préstamo aprobado nunha sesión plenaria anterior e, por tanto, unha vez que chegue esa autorización ministerial probablemente se reflicta na baixada dos gastos que a día de hoxe temos pola débeda do Concello”.
A voceira do goberno municipal rematou a valoración do pleno comentando que “os últimos puntos da orde do día eran dúas mocións do concelleiro do Bloque Nacionalista Galego, que non asistiu á esta sesión plenaria e por tanto non foron tratadas polo resto de concelleiros presentes. Cremos que en certa medida é unha irresponsabilidade que a un pleno no que se abordan os presupostos e o que vai ser a vida económica do noso Concello neste ano 2015 non asista a totalidade de concelleiros da oposición, o que demostra un desinterese por parte dos ausentes”.
