O PAZO DE TOVAR RECIBIU A PRIMEIRA VISITA DUN GRUPO DESPOIS DA SÚA REHABILITACIÓN. FORON ALUMNOS DO IES PERDOURO, DE BURELA

O grupo formado por alumnos do IES Perdouro, de Burela, foi o primeiro que visitou o Pazo de Tovar despois da súa rehabilitación.
A alcaldesa de Lourenzá, Emma Álvarez Chao, anunciou hoxe que “cando se cumpre unha semana da inauguración da rehabilitación do Pazo de Tovar xa recibiu a primeira visita en grupo, concretamente alumnos do IES Perdouro, de Burela, de 13 e 14 anos de idade que cursan 2º da ESO, que viñeron para coñecer máis de cerca a historia e o que queda do antigo Pazo de Tovar. Os rapaces visitaron o Centro de Interpretación dos Pazos Galegos e a fortaleza. Marcharon cunha impresión satisfactoria da estrutura arquitectónica do edificio e tamén da información que lles proporcionou a guía. Incluso subiron ao adarve e dende alí observaron as distintas paisaxes do val de Lourenzá”.
A rexedora municipal comentou que “con esta visita confírmase o interese que ten esta xoia arquitectónica que hai no concello de Lourenzá, que é algo singular porque en toda a provincia de Lugo non hai ningunha construción deste tipo xa que foi feita imitando as típicas fortalezas de Castela”.