Novas

A alcaldesa de Lourenzá, Rocío López, presentou hoxe a programación da XXVIII edición da Festa da Faba de Lourenzá, que se celebrará dos días 5 ao 7 de outubro. As actividades inclúen a venda de fabas, degustacións, tapas elaboradas con esta leguminosa, showcooking, actividades infantís, os concertos musicais de Tumba e Dalle e A Roda e concentracións de vehículos clásicos, entre outras propostas. O pregón será o sábado ás 12:00 horas e correrá a cargo da xornalista Marta Docampo. A rexedora convida a asistir a esta cita.

O Centro de Interpretación da Faba, en Lourenzá, acolleu esta mañá a presentación da segunda edición da Ruta da Faba, da que poderán gozar mariñáns e turistas os días 13, 20 e 27 de outubro. Esta ruta busca poñer en valor o arte, o patrimonio, a natureza, a gastronomía e o cultivo da faba de Lourenzá.

A cuarta edición da Concentración VespaFaba e Clásicos Lourenzá terá lugar do 5 ao 7 de outubro, coincidindo coa celebración da Festa da Faba. Haberá rutas polo val e polos municipios de Xove, Trabada e Riotorto, ademais de xincana, trofeos, agasallos e os asistentes gozarán da gastronomía local. O evento foi presentado en Lourenzá cun acto no que participou a alcaldesa, Rocío López.

O Concello de Lourenzá presentou o cartel da vixésimo oitava edición da Festa da Faba, que se celebrará do 5 ao 7 de outubro. A autora é Aixa Paz Mora, natural de Lourenzá e licenciada en Belas Artes. A alcaldesa, Rocío López, tamén anunciou que a pregoeira da Festa da Faba 2018 será a xornalista e locutora de radio Marta Docampo, laurentina afincada en Madrid. O pregón será o día 6, sábado, ás 12:00 horas.

A representación teatral programada para este sábado, 22 de setembro, no salón de actos do Concello de Lourenzá suspéndese por problemas da compañía A Peneda, de Monterroso, que non pode desprazarse para actuar ese día.

O edil de Cultura, Manuel Arango, anunciou a suspensión desta actividade cultural e explicou que o Concello intentará que a compañía A Peneda represente en Lourenzá a obra prevista para este sábado, A cea dos idiotas, noutra data.

As entradas para presenciar a actuación do actor Carlos Blanco o día 29 deste mes ás 20:30 horas no salón de actos do Concello de Lourenzá xa están esgotadas.

O concelleiro de Cultura, Manuel Arango, explicou que “xa non quedan entradas para a actuación que Carlos Blanco ofrecerá en Lourenzá o día 29 de setembro. Tivo unha gran acollida e sentimos moito non poder atender todas as peticións de entradas, pero o motivo é que temos un salón de actos que se nos queda pequeno para este tipo de eventos”.

A Delegación de Cultura do Concello de Lourenzá ven de presentar a programación teatral que levará a cabo ata o mes de decembro. As representacións darán comezo o 15 de setembro coa compañía Argalleiras Teatro, de Chantada. Ademais esta programación inclúe a actuación do humorista galego Carlos Blanco o día 29 deste mes.

Lourenzá foi protagonista o pasado xoves 23 de agosto do programa “Mariña Marabillosa”, que se emite semanalmente a través de Radio Burela, Radio Foz e Radio Valadouro, coa fin de divulgar e promocionar turísticamente todos os concellos da comarca un por un.

Unha unidade móbil de inspección técnica de vehículos agrícolas estará no mercado comarcal gandeiro de Lourenzá do 25 ao 28 deste mes. Anúnciao a alcaldesa, Rocío López García, a través dun bando.

O horario de atención será de 09:00 a 13:30 horas e de 15:15 a 18:00 horas agás o día 28 que será só pola mañá. A cita previa pode solicitarse por teléfono no 902.30.90.00 ou través da páxina web www.sycitv.com.

Lourenzá, 20 de agosto de 2018. O Cantón de Vilanova de Lourenzá acollerá este mércores, día 22, a partir das 13:00 horas unha actividade infantil de contos, debuxos e degustación gratuíta de produtos da marca Clesa. Anunciouno hoxe o Concello de Lourenzá.